વિદ્યાર્થીનીની છેડતીના કેસમાં લંપટ શિક્ષકને પાંચ વર્ષની કેદ

શાળામાં ધોરણ ૯માં અભ્યાસ કરતી વિદ્યાર્થીની છેડતી કરનાર લંપટ શિક્ષકને કોર્ટે પોકસોના કેસના કસૂરવાર ઠેરવી પાંચ વર્ષ કેદની સજા ફટકારી પીડિતાને વળતર પેટે રૂ .1.50 લાખ ચૂકવવા હુકમ કર્યો હતો.

વર્ષ 2022 દરમિયાન ધોરણ ૯માં અભ્યાસ કરતી 15 વર્ષની વિદ્યાર્થીનીને પાંચ માર્ક ગ્રેસિંગ આપવાની લાલચ આપી કોમ્પ્યુટરના શિક્ષક હિમાંશુ મનોજ મિશ્રા (રહે- વિશ્વકર્માનગર, ખોડીયારનગર / મૂળ – બિહાર ) એ અર્ધનગ્ન ફોટો મેળવી જાતિય સતામણી કરી હતી. ત્યારબાદ તે ફોટાનો મિસ યુઝ કરવાની ધમકી આપી અવારનવાર વિદ્યાર્થીનીનો પીછો કરી ઈમોશનલ બ્લેકમેલ કરી વધુ બીભત્સ ફોટા લીધા હતા. વિદ્યાર્થીના પરિવારજનોએ શિક્ષકને અવારનવાર ઠપકો આપવા છતાં આવું કૃત્ય આચરતા શિક્ષક વિરુદ્ધ વાડી પોલીસ મથકે ફરિયાદ નોંધાવી હતી. આ કેસની સુનાવણી સ્પે. પોક્સો કોર્ટમાં હાથ ધરાતા સરકાર પક્ષ તરફે ધારાશાસ્ત્રી એપીપી પી.સી. પટેલે દલીલો કરી હતી. ફાસ્ટ ટ્રેક સ્પેશિયલ કોર્ટ (પોક્સો) ન્યાયાધીશ શકુંતલા નરેશ સોલંકીએ નોંધ્યું હતું કે, આરોપી વિશેષ નિવેદનમાં પોતાની વિરુદ્ધના પુરાવાનો માત્ર ઇન્કાર કરી ખોટો કેસ કર્યો હોવાનું જણાવે છે. પરંતુ તે સિવાય ખાસ કોઈ મહત્વનો બચાવ રેકોર્ડ ઉપર ઉપસ્થિત કરી શકેલ નથી કે જેથી પ્રોસિક્યુશનનો કેસ શંકાસ્પદ બને.